தேர்தலுக்கு முன் நிறைவேற்று அதிகாரம் கொண்ட ஜனாதிபதி முறைமையை நீக்க திட்டமா..!

அடுத்த வருடம் நடைபெறவுள்ள ஜனாதிபதித் தேர்தலுக்கு முன்னர் நிறைவேற்று அதிகாரம் கொண்ட ஜனாதிபதி முறைமையை நீக்குவதற்கான நடவடிக்கைகள் முன்னெடுக்கப்பட்டு வருவதாகத் தகவல் வெளியாகியுள்ளது.

இந்தநிலையில் எந்தவொரு வேட்பாளரும் அல்லது அரசியல் கட்சியும் தேர்தலில் 50 சதவீத வெற்றியைப் பெற முடியாது என இலங்கையின் அரசியல் தரப்புக்கள் குறிப்பிட்டுள்ளன.

ஏற்கனவே இது தொடர்பில் ஜனாதிபதி ரணில் விக்ரமசிங்கவினால் இது தொடர்பான கலந்துரையாடல்கள் இடம்பெற்றுள்ளதாகவும் நீதி அமைச்சர் விஜயதாச ராஜபக்ச, தேர்தல் முறைமையை மாற்றுவதற்கான அமைச்சரவை பத்திரத்தை தயாரித்துள்ளதாகவும் தெரிவிக்கப்பட்டுள்ளது.

இந்த அமைச்சரவைப் பத்திரம், நிறைவேற்று ஜனாதிபதி முறைமையை ஒழிக்க வேண்டுமா மற்றும் நிறைவேற்று அதிகாரம் கொண்ட பிரதமரைக் கொண்டு நாடாளுமன்றம் மேலும் பலப்படுத்தப்பட வேண்டுமா என்பதை அறிய பொது வாக்கெடுப்பு நடத்தப்படுவதற்கு வழிவகுக்கும் என்று எதிர்பார்க்கப்படுகிறது.

தற்போதைய அரசாங்கம் நிறைவேற்று ஜனாதிபதியுடன் தொடர்வதற்கான ஆணையின் பேரில் தெரிவு செய்யப்பட்டுள்ளதால், குறைந்தபட்சம் 2025 பொதுத் தேர்தல் முடியும் வரையாவது நிறைவேற்று ஜனாதிபதி முறை தொடர வேண்டும் என்பதே பொதுஜன பெரமுனவின் கருத்தாகும்.

நிறைவேற்று அதிகார முறை ஒழிக்கப்பட வேண்டுமானால், அதனை 2025 பொதுத் தேர்தலுக்குப் பிறகு புதிய அரசாங்கம் அமைந்தவுடன் மேற்கொள்ளமுடியும் என்று அந்தக்கட்சி குறிப்பிட்டுள்ளது.

அதேநேரம் நிறைவேற்று அதிகாரம் கொண்ட ஜனாதிபதி முறைமையை ஒழிக்க வேண்டும் என்று எப்போதும் கூறிவரும் மக்கள் விடுதலை முன்னணியும் இந்த யோசனை நாடாளுமன்றுக்கு வரும்போது அதனை எதிர்க்கும் என்று தெரிவிக்கப்பட்டுள்ளது.

இதற்கிடையில், தேர்தல் சீர்திருத்தம் தொடர்பான அமைச்சரவைப் பத்திரம் வந்ததும், அரசியல் சூழல் சரியாக இருந்தால், ஜனாதிபதியுடன் பொது வாக்கெடுப்பு நடத்துவது குறித்து பேச்சுவார்த்தை நடத்தப்படும் என அரசாங்கத்தின் சிரேஸ்ட நாடாளுமன்ற உறுப்பினர்கள் தெரிவித்துள்ளனர்.

சட்டப்படி பொது வாக்கெடுப்புக்கு குடியரசுத் தலைவர் மட்டுமே அழைப்பு விடுக்க முடியும். சர்வஜன வாக்கெடுப்பு முடிவுகளின் அடிப்படையில் நிறைவேற்று அதிகாரம் கொண்ட ஜனாதிபதி முறைமையை ஒழிப்பதற்கான மூன்றில் இரண்டு பெரும்பான்மையைப் பெறுவதற்கு இந்த விடயம் நாடாளுமன்றில் சமர்ப்பிக்கப்படும்.

இது நடந்தால், 2024 நவம்பரில் நடைபெறும் என்று எதிர்பார்க்கப்படும் ஜனாதிபதித் தேர்தல் ஒத்திவைக்கப்படலாம்.